烏拉圭首奪世青盃　絕殺功臣獲皇馬垂青

足球博彩神器，每日重心提供盡在《彩報》：http://win.on.cc/football/　

周一(12日)凌晨世青盃決賽，烏拉圭U20憑盧斯安奴洛迪古斯完場前絕殺，1比0擊敗意大利U20奪得冠軍，亦係烏拉圭歷來第1次贏得世青盃。奪冠英雄盧斯安奴洛迪古斯，據聞已得到西甲班霸皇家馬德里垂青，前途無限

今屆決賽兩隊都係從未贏過世青盃，烏拉圭U20今場憑較佳個人技術不斷突破，令意大利U20球員要用超技術阻止，全場有5個球員拎到黃牌。去到86分鐘，烏拉圭U20傳中製造混亂，盧斯安奴洛迪古斯近門頂入唯一入球，助烏拉圭U20歷史性捧盃。

現年19歲嘅盧斯安奴洛迪古斯效力蒙特維多利物浦，據馬德里媒體《Defensa Central》報道，皇家馬德里一直有派球探觀察呢位前鋒，事實上皇馬對烏拉圭青訓早已非常熟悉，皇馬陣中亦有另一烏拉圭新星前鋒艾華路洛迪古斯，呢對前鋒組合將來有望喺西甲合作。