皇馬力捧新王　雲尼斯奧斯改着7號

足球博彩神器，每日重心提供盡在《彩報》：http://win.on.cc/football/　

皇家馬德里金球前鋒賓施馬離隊後，巴西前鋒雲尼斯奧斯祖利亞就成為球隊孭飛球星，呢支西甲勁旅周一(12日)宣布，雲尼斯奧斯下季將會改着7號波衫，延續魯爾、C朗拿度嘅「傳奇」故事。

22歲嘅雲尼斯奧斯5年前由法林明高加盟，最初着28號波衫，之後改着25號，最近3季都係着20號，隨住夏薩特提前解約離隊，皇馬就宣布騰空嘅7號波衫，下季會由雲尼斯奧斯繼承。皇馬件7號波衫充滿歷史，曾經由哥柏、布達堅奴、魯爾、C朗拿度等傳奇擁有，雲尼斯奧斯今次拎到7號，就係地位嘅象徵。

雲尼斯奧斯早前因為受到種族歧視，發文怒轟西甲同西班牙縱容種族主義，一度被傳可能離隊，依家着7號波衫就粉碎傳聞，證明皇馬準備力捧佢做新王。除雲尼斯奧斯外，洛迪高高斯下季亦會由21號轉為11號，繼承馬高阿辛斯奧嘅號碼。