「蒙面俠」缺陣　克羅地亞仲有1位天才中堅

最強博彩盤路過關神器《串績王》：http://win.on.cc/football/　

克羅地亞將於周四(15日)凌晨歐國聯4強對荷蘭，上年世界盃決賽周有出色表現嘅中堅「蒙面俠」加華度爾因傷退隊，對防線造成打擊，幸好球隊人才輩出，23歲中堅蘇達路嶄露頭角，並獲阿仙奴垂青，今屆歐國聯等睇佢表演。

身高1米90嘅蘇達路上年6月首次為克羅地亞上陣，並有份入選上年世界盃大軍名單，但只曾於無關痛癢嘅季軍戰上陣對摩洛哥。不過，呢位效力薩格勒布戴拿模嘅高大中堅踏入2023年後，開始獲得克羅地亞主帥達歷重用，喺3月2場歐國盃外圍賽都擔任正選，並引起阿仙奴方面注意，計劃將蘇達路收歸旗下，據悉薩格勒布戴拿模要求1,800萬鎊(約1.76億港元)轉會費，價錢絕對抵玩。

盛傳阿仙奴中堅威廉沙列巴要求大幅加薪，否則就唔續約，如果兵工廠可以簽入蘇達路，就唔怕呢位法國國腳「跳草裙舞」。

另外，克羅地亞34歲翼鋒比列錫想離開熱刺，有可能重返國際米蘭。