皇馬重召法蘭加西亞　同日入選國家隊

足球博彩神器，每日重心提供盡在《彩報》：http://win.on.cc/football/　

皇馬早前簽入祖迪比寧咸之後，日前官宣從華歷簡奴重召左閘法蘭加西亞回巢，由「老佛爺」皮里茲主持歡迎儀式，而且好事接二連三，就喺同一日，法蘭加西亞首次獲西班牙國家隊徵召，晉身大國腳。

23歲嘅法蘭加西亞係皇馬青訓出身，不過僅為一隊上陣1次，2020年外借到華歷簡奴，一年後正式轉會，過去3季由西乙至西甲為華歷簡奴上陣122場入5球，皇馬日前啟動回購條款，以500萬歐元轉會費簽回法蘭加西亞，簽約至2027年，準備新球季予以重用。

就在皇馬本周一官宣簽入法蘭加西亞，西班牙國家隊公布歐國聯4強對意大利大名單，法蘭加西亞榜上有名，亦係佢首次入選大國腳，佢將會頂替受傷嘅祖安巴尼特國家隊位置，暫時未能為皇馬披甲嘅佢，有機會先在歐國聯亮相，到時可以留意吓呢位皇馬新左閘表現如何。