經過5次談判　巴塞成功說服根度簡加盟

最強博彩盤路過關神器《串績王》：http://win.on.cc/football/　

曼城痛失隊長根度簡，根據西班牙《世界體育報》爆料，西甲冠軍巴塞隆拿會方同呢位32歲德國國腳經過5次談判之後，終於成功說服佢今夏以自由身加盟，據悉雙方將會簽約2年，並有權再延長多1年合約。

根度簡將於6月底約滿，曼城方面曾經提出同呢位中場續約1年，但佢希望獲得2年以上合約，結果傾唔掂數，令巴塞隆拿有機可乘。

事實上，巴塞近幾個月一直力邀根度簡加盟，但佢對於球會財政存在疑慮，擔心巴塞薪酬超出西甲上限，未能註冊新兵。不過，巴塞方面向根度簡大派定心丸，加上教練沙維最近亦加入談判，最終打動根度簡。阿仙奴主帥阿迪達亦曾經有意簽入根度簡，但依家計劃落空。

根度簡效力曼城7年以來，上陣304場入60球，協助「藍月亮」捧過5次英超、2次英足盃、4次英聯盃及1次歐聯冠軍，今季以隊長身份率領曼城歷史性成為英超、英足盃及歐聯「三冠王」，總算完美告別。