【官宣】艾納斯簽波索域　C朗有好幫手

足球博彩神器，每日重心提供盡在《彩報》：http://win.on.cc/football/　

沙特阿拉伯聯賽今夏向歐洲球壇瘋狂挖角，多支勁旅都成功簽到大牌球星，上年底率先引入C朗拿度嘅艾納斯，周二(4日)終於有着落，宣布以1,800萬歐元(約1.54億港元)簽入國際米蘭中場波索域，以2,500萬歐元(約2.13億港元)年薪簽約3年。

睇住冠軍伊蒂哈德簽入賓施馬同尼高路簡迪、希拉爾又搶到魯賓尼維斯同高列巴尼，艾納斯當然要搶人輔助C朗拿度，30歲嘅波索域本來係巴塞隆拿獵物，不過艾納斯最終都贏出呢場爭奪戰，艾納斯twitter宣布嗰陣亦暗寸巴塞：「全世界都想要波索域，但波索域只要我哋！」

艾納斯簽入波索域後仲會繼續增兵，早前佢哋已非常接近收購車路士翼鋒薛耶治，不過呢位摩洛哥球星體測出現問題，能唔能夠成事仲係未知數，亦有傳聞指艾納斯正高薪邀請啱啱約滿曼聯嘅迪基亞加盟。