阿仙奴好消息　天才中堅續約至2027年

最強博彩盤路過關神器《串績王》：http://win.on.cc/football/　

上季英超亞軍阿仙奴近期除咗積極增兵之外，亦不忘留住現有主力，正式宣布同中堅威廉沙列巴續約至2027年6月，據悉呢位22歲法國中堅將獲得22萬鎊(約220萬港元)周薪，由原本着12號球衣改為着2號。

阿仙奴2019年向法甲球隊聖伊天收購威廉沙列巴，隨即將佢外借，直至上年夏天先至收回自用，呢位身高1米92嘅新星表現一鳴驚人，迅速成為兵工廠防線主力，上陣33場，並有3球進帳及1次助攻，可惜佢因為受傷自3月中以來一直缺陣。

由於威廉沙列巴只剩下1年合約，一度傳出巴黎聖日耳門有意趁機搶人，幸好阿仙奴最終成功同佢達成續約協議。

威廉沙列巴喺社交網上話：「阿仙奴對我意義重大，我要感謝領隊阿迪達、總監伊度及工作人員，係佢哋延長我喺呢度嘅時間，阿仙奴球迷們，我哋一直有特殊聯繫，現在係時候進一步加深關係。」阿迪達大讚威廉沙列巴天才橫溢，認為佢續約，對於球隊未來發展非常重要。