【官宣】PSG狂簽第5人！盧卡斯靴南迪斯加盟

足球博彩神器，每日重心提供盡在《彩報》：http://win.on.cc/football/　

法甲豪門巴黎聖日耳門(PSG)近日連環簽人，繼馬高阿辛斯奧、文路爾烏加迪、史堅尼亞同李康仁後，周一(10日)再宣布喺拜仁慕尼黑收購法國後衞盧卡斯靴南迪斯，轉會費為4,000萬歐元(約3.43億港元)外加獎金，亦係新帥安歷基上任後第5個新兵。

27歲嘅盧卡斯靴南迪斯效力拜仁慕尼黑4年，上季受嚴重膝傷困擾令上陣機會大減，由於佢嘅合約只係剩番1年，令拜仁慕尼黑要將佢「平賣」，結果畀PSG有機可乘。消息指盧卡斯靴南迪斯同PSG簽約5年，將會成為安歷基防線嘅核心人物。

盧卡斯靴南迪斯簽約後表示：「我真係好興奮，我等咗呢次轉會好耐，依家終於得到落實，對我同我屋企人嚟講都係好有意義嘅一日。」盧卡斯靴南迪斯喺法國出世，但自細就去西班牙生活，亦係喺馬德里體育會青年軍出身，今次係佢首次登陸法甲舞台。