港超聯 培育年輕球員 東方盼3年後重返班霸行列
2023年07月13日 12:28
東網電視
更多新聞短片
東方體育會副主席游永強（右二）、東方體育會主席鄭啟明（左二）及榮譽副會長何智焜（左三），齊齊到場切燒豬。（李浚湣攝）
港超聯球隊東方周四（13日）於將軍澳足球訓練中心（FTC），展開操練及舉行季前拜神儀式。東方體育會副主席游永強表示，今年班費將逾千萬，目標爭入前4，同時又會繼續培育更多本地年輕球員，盼球隊在兩至三年後，可以重返班霸行列。
東方今早完成操練後，隨即舉行季前拜神儀，以及拍攝大合照，而多名球隊管理層包括東方體育會副主席游永強亦有到場。東方今季有巴杜姆、蔡立靖、胡晉銘等多名球員離隊，但暫時只有借將洛迪古斯、黃浩然及余在言3名新兵加盟，大軍名單僅22人，當中外援更只得3位。
東方體育會副主席游永強接受記者訪問時，提到今季班費維持逾千萬，仍然會以前4為目標：「隊隊都想拎冠軍，但我哋都會面對現實，始終球員經驗仲差咗啲。今年會繼續畀年青球員出賽機會，培育更多本地球員代表港隊，但希望佢哋可以團結一致，力爭上游。」「游生」又認為成績如果要再上一層樓，抑或要重返班霸行列的話，需要年輕球員慢慢成長，預計需要兩至三年時間。
對於兩支港超勁旅傑志及理文，今季繼續簽入不少大牌外援，「游生」坦言友會與己隊發展方針不同，又表示東方並非『老細波』，球隊已經有長遠規劃，行出一個體育產業模式：「過去有段時間我哋都投放咗好多資源，幾個港超最佳射手都喺我哋到，但都未必保證奪冠，最緊要反而係球員嘅配合同教練。燒錢係一件好辛苦嘅事，我哋會朝着英超白禮頓嘅模式，著重對球員嘅培訓，以一個合理嘅費用達到最好成績。」
至於上季「最佳教練」盧比度（Chino），則對3名新兵讚不絕口：「今季無咗胡晉銘，但余在言係一個幾好嘅替代品，更加後生同有唔錯嘅前景，而香港中堅明顯唔夠人，希望幫到黃浩然繼續進步，繼而代表港隊。當然洛迪古斯都對我哋好重要，佢喺香港已經7年，有好強嘅入球能力，無錯上年巴杜姆踢得唔錯，但佢都唔係傳統9號。」
不過Chino表示球隊目前在右閘、翼鋒及攻中位置仍需補強，又透露或再有新援來投：「前晉峰翼鋒費利浦薩之前原本好大機會加盟，但最後選擇咗去阿聯酋，對我嘅組軍都有影響。不過我哋目前有3個嚟自蘇格蘭、南韓同澳洲外援喺到試腳，表現都令我好滿意，再加一名24歲嘅西班牙高大中堅，佢會喺中國集訓個陣會合我哋。」
值得一提，東方早前獲球會主席鄭啟明先生旗下美建集團注資全力支持，而有關易名一事已獲足總接納，「龍獅」兩字將會刪去，球隊下季將以「東方」”Eastern FC” 名義作賽，惟會徽及管理層將不會有所變動。 除此之外，東方將於本周六(15日)，啟程前往中國順德，進行為期兩星期集訓，回港後亦將與數支港超球隊「拍跳」。
東方2023/24 職球員名單：
主教練 盧比度
助教 高尼路、羅志焜
龍門教練 列卡度拿華路
技術分析師 曼根
運動及復康治療師 柏奧
物理治療師 陳振業、林嘉舜
行政經理 陳子龍
球隊助理 薜輝龍、馮鎮華
媒體幹事 羅杰文
門將： 葉鴻輝、廖富源、鍾凱文
後衞：高素巴耶夫、鐘樂安、黃浩然、梁冠聰、黃梓浩、林千裕
中場：余在言、梁振邦、馬希偉、馬高斯、蕭政、楊棟棋、柏拔、張文浩
前鋒：洛迪古斯、孫銘謙、黃皓雋、高銘浩、李俊霆