拜仁開綠燈　文尼準備同C朗做隊友

最強博彩盤路過關神器《串績王》：http://win.on.cc/football/　

拜仁慕尼黑準備出售前鋒沙迪奧文尼一事有新發展，根據德國媒體《踢球者》爆料，拜仁已經批准呢位31歲塞內加爾國腳同艾納斯傾加盟事宜，意味佢好大機會轉投呢支沙特阿拉伯豪門，同C朗做隊友。

《天空體育》早前報道，指拜仁願意以低價1,700萬鎊(約1.74億港元)出售加盟僅1季嘅沙迪奧文尼，原來買家又係來自沙特。《踢球者》指拜仁教練杜曹同意放走沙迪奧文尼，新一季備戰工作唔會預佢，艾納斯嘅代表已經同拜仁管理層及沙迪奧文尼見過面，相信好大機會達成轉會協議。

沙迪奧文尼上季為拜仁上陣38場僅入12球，更曾出拳打傷隊友利萊辛尼，遭到球會處罰，當時已經傳出佢可能被拜仁賣走。

不過，艾納斯因為未能付清前李斯特城前鋒阿密特穆沙嘅轉會費，早前被國際足協禁止今夏轉會窗簽入新球員，所以會方必須找埋條尾數，先至可以簽入沙迪奧文尼。