【官宣】奧拿拿加盟曼聯：一生努力為呢刻！

最強博彩盤路過關神器《串績王》：http://win.on.cc/football/　

曼聯新門將人選終於落實，「紅魔鬼」周五(21日)官方宣布，喀麥隆國腳奧拿拿由國際米蘭加盟，雙方簽約5年，據報轉會費為4,700萬鎊(約4.72億港元)，成為史上第3貴價門將。奧拿拿加盟後即大賣口乖：「加盟曼聯係無上光榮，我一生努力就係為呢一刻！」

現年27歲嘅奧拿拿係「用波型」門將，亦係曼聯領隊坦哈格控球戰術需要嘅特質，所以不惜工本都要搵佢取代迪基亞，將會着24號波衫嘅奧拿拿簽約後表示：「加盟曼聯係無上光榮，我一生努力就係為呢一刻！行出奧脫福球場守護大門、貢獻球隊會係另一神奇經歷，曼聯歷史上有好多偉大門將，我會傾盡全力去寫自己嘅傳奇，好興奮可以再次同坦哈格合作。」

奧拿拿成為阿列沙巴拿加同艾利臣比加後，史上第3高轉會費門將，佢會即時飛去美國同正喺當地集訓嘅大軍會合，最快會喺周日(23日)凌晨對阿仙奴嘅熱身賽上陣。