最強博彩盤路過關神器《串績王》：http://win.on.cc/football/　

曾經效力曼聯嘅意大利前鋒基奧斯比羅斯宣布掛靴，結束19年職業球員生涯，呢位射手原本天才橫溢，但因為經常受傷，事業大受打擊，近年睇波多過踢波，最終決定黯然退役。

現年36歲嘅基奧斯比羅斯出身於曼聯青年軍，其後輾轉加盟維拉利爾，為呢支西甲球隊上陣192場入82球，原本發展唔錯，但其後多次受重傷，嚴重影響發揮，成為「人球」先後效力過費倫天拿、利雲特、切爾達、熱拿亞，甚至去美職搵食，加盟皇家鹽湖城，但表現都令人失望。

羅斯仔2年前開始已處於半退休狀態，大部份時間擔任足球評述員，期間曾經短暫效力意乙球隊史帕爾，但今夏已約滿離隊，佢喺社交網發表千字文，感謝各界支持，雖然自己仍然好熱愛足球，但已到咗離開嘅時候。