【官宣】富咸簽魯爾占美尼斯

最強博彩盤路過關神器《串績王》：http://win.on.cc/football/　

英超球會富咸周三(26日)宣布，成功向狼隊簽入墨西哥前鋒魯爾占美尼斯，據報轉會費為550萬鎊(約5,530萬港元)，雙方簽約2年，富咸獲呢位中鋒加盟，預料將會取代「扭計」罷踢嘅阿歷山大米祖域。

32歲嘅魯爾占美尼斯5年前加盟狼隊，頭2季都有雙位數入球，但自2020年頭部重傷長抖，復出後狀態大不如前，今次轉會希望重振雄風，魯爾占美尼斯向富咸官網表示：「今次轉會對我非常重要，我會盡最大努力幫助球隊，好開心可以為富咸效力，我會喺英超盡量爭取入波。」

富咸上季首席射手阿歷山大米祖域，早前不滿球會索取太高轉會費，令佢加盟沙特豪門希拉爾告吹，據報佢打算罷踢以示不滿，消息指喺經理人同球員工會介入後，呢位塞爾維亞前鋒仍會考慮喺周四(27日)隨隊展開季前集訓，但魯爾占美尼斯加盟後，米祖域就算留隊亦可能失去正選位置。