熱刺獎盃櫃有着落　李察利臣揚言大爆發

足球博彩神器，每日重心提供盡在《彩報》：http://win.on.cc/football/　

正喺亞洲集訓嘅英超球會熱刺，周三(27日)晚喺新加坡同獅城水手踢熱身賽，結果憑巴西前鋒李察利臣下半場連中三元，最終大勝5比1捧走「老虎盃」。李察利臣經過上季失意後，賽後揚言新一季會大爆發，指熱刺會有個美好球季。

熱刺由新帥普斯迪高路執教，今場有哈利卡尼領軍強陣出擊，雖然14分鐘意外先失波，不過完半場前靠哈利卡尼射入12碼追平。下半場熱刺換入多名球員，代替哈利卡尼嘅李察利臣大爆發個人獨取3球，加上阿根廷中場盧施素入波，帶領熱刺反勝5比1捧盃。

李察利臣賽後表示：「我開心到飛起！多謝新加坡嘅球迷，我好鍾意呢個地方，今次集訓對我同熱刺都好有幫助，我依家感覺好好，上季因為斷斷續續嘅傷患，令我嘅狀態唔係咁好，不過依家我覺得好弗，新一季會係一個美好球季。」熱刺目前正經歷15年冠軍荒，今次季前捧盃為球隊注下強心針。