盧卡斯將重投聖保羅　同J神拍住上

最強博彩盤路過關神器《串績王》：http://win.on.cc/football/　

熱刺翼鋒盧卡斯莫拉今夏自由身離隊，根據「轉會權威」記者羅曼諾(Fabrizio Romano)爆料，呢位30歲巴西球員即將重返母會聖保羅，但只係簽約至12月，意味佢可能等明年1月冬季轉會市場重開後，再戰歐洲球壇。

盧卡斯莫拉出身於聖保羅青訓系統，2013年加盟巴黎聖日耳門，5年前轉投熱刺，為呢支倫敦球隊上陣221場入39球，代表作一定係2019年5月歐聯4強次回合，佢上演帽子戲法，協助熱刺奇迹反勝阿積士，打入決賽。不過，盧卡斯莫拉之後表現無以為繼，上季英超僅上陣15次入1球，最終不獲續約。

聖保羅日前已經簽入曾經效力皇馬同拜仁慕尼黑嘅中場占士洛迪古斯，依家加埋盧卡斯莫拉，進一步增強球隊星味。

不過，據悉盧卡斯莫拉只會同聖保羅簽短約，踢到今年12月巴甲收咧後，就會再次恢復自由身離隊，相信佢仍然希望重返歐洲球壇搵食。