有得留低！莊尼伊雲斯獲曼聯開1年合約

最強博彩盤路過關神器《串績王》：http://win.on.cc/football/　

35歲嘅北愛爾蘭中堅莊尼伊雲斯，離開曼聯8年後今夏神奇回歸，簽短期合約喺季前熱身賽「湊人數」，不過據《貝爾法斯特電訊報》爆料，曼聯領隊坦哈格對莊尼伊雲斯嘅表現非常滿意，將會同佢簽約1年，「愛回家」戲碼正式上演。

莊尼伊雲斯喺季前熱身賽為曼聯3次上陣，合共踢咗147分鐘，消息指曼聯決意賣走哈利馬古尼同艾歷拜利2名中堅，需要人手填補空缺，所以決定向莊尼伊雲斯開出1年合約，畀佢擔任華拉尼、利辛度馬天尼斯、域陀連迪路夫後嘅「第4中堅」。

莊尼伊雲斯係曼聯青訓出身，曾為曼聯一隊效力9年，之後轉投西布朗同李斯特城，今個夏天同李斯特城約滿後回復自由身，佢老婆Helen McConnell亦係曼聯官方電視台主持之一，充滿「曼聯DNA」。