沙治奧拉莫斯等落班　列基美幫手搭路

足球博彩神器，每日重心提供盡在《彩報》：http://win.on.cc/football/　

現年37歲嘅沙治奧拉莫斯，夏天約滿巴黎聖日耳門(PSG)後一直未有班落，傳聞美職同沙特球會都曾經向佢提出聘約，不過據阿根廷傳媒報道，沙治奧拉莫斯下一站好可能係阿甲，小保加副會長兼總監列基美已出手拉攏呢位西班牙名將加盟。

據報沙治奧拉莫斯原本希望重投出道嘅西維爾，不過西維爾無意接收呢位老將，阿根廷《TyCSports》報道，準備大展拳腳嘅小保加總監列基美，已經鎖定沙治奧拉莫斯為目標，準備親自遊說呢位中堅加盟，尤其小保加正出戰自由盃16強，有望挑戰冠軍寶座。

阿根廷名牌小保加近期積極招攬球星，上月成功簽入烏拉圭前鋒卡雲尼，陣中亦有馬高斯盧祖、羅美路兩位前曼聯球員，傳聞小保加仲想向曼聯借用年輕翼鋒法根度柏利斯查，野心勃勃。