【官宣】國米簽入「12碼專家」頂替奧拿拿

意甲勁旅國際米蘭正式宣布簽入拜仁慕尼黑門將恩尼森馬，頂替早前轉投曼聯嘅奧拿拿，據悉呢位34歲瑞士國腳嘅轉會費為600萬歐元(約5,100萬港元)，大約僅及奧拿拿十份之一，國米今次買賣門將一出一入，可以大賺一筆。

恩尼森馬球員生涯大部份時間效力德甲球隊慕遜加柏，今年1月轉投拜仁慕尼黑，暫代受傷長抖嘅紐亞，估唔到半年後又轉會，佢話：「有無數理由驅使我選擇加盟國際米蘭，包括佢哋係一間偉大球會，擁有輝煌歷史同傳統，我亦期待接受新挑戰。」恩尼森馬今次簽約3年，隨時可能效力國米至掛靴。

值得一提，恩尼森馬係「12碼專家」，職業生涯102次面對12碼，有25次成功撲出，包括2年前歐國盃16強互射12碼階段，撲出法國球星基利安麥巴比嘅主射，協助瑞士爆冷晉級8強。