【官宣】23歲坐正！列斯占士成車路士隊長

車路士周四(10日)宣布，英格蘭國腳列斯占士喺新一季成為球隊隊長，接替離隊艾斯派古達嘅職務。只得23歲嘅列斯占士今次獲委以重任，令佢成為1975年嘅韋健士(18歲)之後，車路士接近半世紀最年輕嘅正式隊長。

過去4年擔任車路士隊長嘅艾斯派古達離隊，加上佐真奴、尼高路簡迪、高華錫等老將亦先後走人，作為車路士正選唯一一個「30+」嘅堤亞高施華，原被視為新隊長大熱，不過車路士周四宣布列斯占士「跑出」。

列斯占士向車路士官網表示：「好開心可以負起呢個角色同責任，車路士過往有好多出色隊長，我知自己責任重大，但同時亦好興奮，我6歲已經加入車路士，能夠成為球隊隊長，對我同我家人都係一大榮耀。」