英超豪門喜訊！下季有5個歐聯席位？

英超競爭激烈，除咗傳統「Big 6」，近年仲有紐卡素、阿士東維拉同白禮頓等冒起，4個歐聯席位爭崩頭。英超賽會周三(9日)宣布，喺歐聯全面改制下，新一季英超有機會拎到5個歐聯參賽名額，最極端情況甚至可能有7隊一齊踢歐聯！

英超聲明表示：「英超歷史上首次出現，5支球隊有機會透過聯賽排名拎到歐聯資格。」根據24/25球季歐聯新制度，上一賽季喺歐洲賽事獲得最高積分嘅2個聯賽，將會額外得到1個歐聯席位，意味如果英超球會今季維持近年出色嘅歐戰表現，今季英超前5名球隊都可以出戰歐聯(24/25)。

數據顯示，近6個歐洲球季，英超有5季都係表現最好嘅2個聯賽之一，上季曼城同韋斯咸就分別贏得歐聯同歐協聯冠軍，如果以22/23球季做例子，英超排第5位嘅利物浦會獲得歐聯資格。最極端情況下，如果英超球隊贏到今季歐聯同歐霸冠軍，兩隊又同時未入聯賽前5，就會破天荒出現7隊同時踢24/25歐聯嘅盛況。