C朗「4連發」入決賽　登陸沙特首冠在望

C朗拿度登陸沙特阿拉伯後，距離首個冠軍只差1步！周四(10日)阿拉伯冠軍盃4強，艾納斯憑C朗一箭定江山，1比0擊敗伊拉克球會SC艾索達殺入決賽。連埋今場，C朗已經連續4場有波入，艾納斯會喺周日(13日)凌晨同希拉爾對決，力爭C朗喺沙特首個冠軍。

艾納斯今場繼續排出C朗同沙迪奧文尼呢條夢幻攻擊線，面對SC艾索達一直控制戰局，不過佢哋要去到75分鐘先打破僵局，沙迪奧文尼禁區內博到12碼，由C朗操刀射入全場唯一入球。C朗喺分組賽最後2輪、8強同4強都有入波，絕對係艾納斯殺入決賽最大功臣。

38歲嘅C朗賽後喺個人twitter興奮留言：「決賽，Here we go！全隊都做得好好，特別多謝球迷嘅神奇支持，你哋一直推動我哋前進！」不過，C朗要捧盃仲要過希拉爾一關，呢支同樣來自沙特嘅豪門今季大事增兵，有魯賓尼維爾、高列巴尼、馬爾甘同米連高域沙域等球星壓陣，唔容易應付。