賣大包！阿仙奴簽大衞拉耶只要300萬鎊！

阿仙奴志切挑戰曼城冠軍寶座，今個夏天大事增兵，聯賽開鑼前將再獲賓福特門將大衞拉耶加盟。最令球迷驚訝嘅係，阿仙奴今次只係需要畀300萬鎊(約3,000萬港元)借用費，就獲得呢位英超最佳門將之一加盟，賓福特今次真係「賣大包」。

近日消息指阿仙奴會用3,000萬鎊(約3億港元)收購大衞拉耶，不過賓福特為幫助阿仙奴符合財政公平條例，願意以「先借後買」方式交易，阿仙奴只要畀300萬鎊就可以「先用為快」，如果啱用有權再畀多2,700萬鎊(約2.7億港元)買斷，非常着數。

預計大衞拉耶加盟阿仙奴後會先做後備，但會向首席門將蘭斯達爾作出強力挑戰，阿仙奴領隊阿迪達一直強調要製造隊內競爭，大衞拉耶同蘭斯達爾邊個可以最後「坐正」難以預料。