般尼發掘「新基亞利殊」　高柏尼無懼曼城

上季英冠冠軍般尼重返英超，第1擊就面對王者曼城，領隊高柏尼亦會同師傅哥迪奧拿重逢。雖然般尼被一致睇死，不過高柏尼仍表明希望「個個星期對曼城」，深信般尼球員可以喺英超硬仗中成長，直指佢嘅球員有力成為「下一個基亞利殊」。

作為哥迪奧拿徒弟嘅高柏尼，將般尼由以往高Q大棍變成傳控進攻型球隊，可唔可以喺英超立足備受注目，高柏尼就話：「我唔擔心般尼喺英超成績係點，我只係關心球員有冇進步、有冇踢出自己嘅風格，如果球員進步夠快，或者我哋會享受多啲美好時光。」高柏尼對佢班球員信心十足：「我深信般尼依家嘅球員，終有一日會成為基亞利殊，贏到好多錦標。」

對於首戰就對住最強球隊曼城，高柏尼亦冇驚過：「我唔覺得太早(對曼城)，我之前講過，如果有得選擇，我希望每個星期都對曼城呢種水平球隊，因為咁樣係令球隊進步最快嘅方法。」般尼季前引入多名新兵，包括向曼城簽入英格蘭U21門將占士查科特。