拜仁車仔埋枱傾　打包史達寧Kepa

拜仁慕尼黑除咗斟介哈利卡尼，主帥杜曹一直想簽車路士球員，近日佢又有新目標，睇中史達寧同阿列沙巴拿加，報道指拜仁同車路士將進行談判，商談兩人轉會事宜。

車路士今季大換血，大批球員離隊，之前出售夏維斯同美臣蒙特，杜曹都有參與洽購，結果兩人轉投阿仙奴同曼聯，杜曹近日繼續向車路士球員打主意，打算收購史達寧，同埋先借後買阿列沙巴拿加。

德國傳媒報道，拜仁斟介哈利卡尼之餘，仲打算出價4,300萬歐元(約3.7億港元)收購史達寧，移植一對英格蘭進攻柏檔到拜仁，杜曹上季同史達寧曾短暫合作，但後來杜曹被辭退，今次希望再續前緣。

阿列沙巴拿加係杜曹舊部，由於門將紐亞仍養傷，恩尼森馬可能離隊，車路士又簽入羅拔山齊士，杜曹睇準時機斟介Kepa，打算先借後買，德國傳媒報道，Kepa表示願意轉會，稍後拜仁同車仔就會埋枱傾條件。