湯希頓操練受傷　曼聯急斟土超門將

曼聯今夏簽入喀麥隆門將奧拿拿，原本以為大門無憂，不過日前操練又出現事故，2號門將湯希頓訓練期間受傷，據報要休息數個星期，令本來已經想簽多個龍門嘅曼聯加緊行動，消息指費倫巴治門將比恩迪亞成為主要目標。

英國傳媒報道，37歲嘅湯希頓喺曼聯訓練入面受傷，據報小腿肌肉傷患令佢要休戰「數星期」，曼聯名單上雖然仲有甸恩軒達臣同高華，但前者同領隊坦哈格不和已被放入雪櫃，23歲捷克門將高華亦將賣畀利華古遜，加上早前已將3號門將比索賣去新特蘭，令選擇非常有限。

英國《每日郵報》報道，曼聯收購日本國腳鈴木彩艷失敗後，依家想簽費倫巴治門將比恩迪亞，呢位25歲土耳門國腳有1米98身高，據報轉會費只係500萬鎊(約5,000萬港元)就可以成事。