同英人唔同命　比宁咸西甲处子战入波

同样于今夏以天价转会费跳槽嘅祖迪比宁咸，开局远胜英格兰国家队队友哈利卡尼，呢位20岁中场新星喺周日(13日)凌晨首次西甲上阵，立即射入靓波，协助皇家马德里作客以2比0击败毕尔包，新一季旗开得胜，祖迪比宁咸演出近乎完美，被誉为自球王施丹之后，皇马最强“5号仔”。

皇马虽然今季失去射手宾施马，但由3位“00后”洛迪高高斯、云尼斯奥斯祖利亚、祖迪比宁咸组成嘅攻击铁三角威力更强，上半场28分钟，由洛迪高高斯射入打开纪录，仅过8分钟，祖迪比宁咸接应角球，巧妙凌空笠射入网，非常潇洒，加佢上身披5号球衣，好有当年施丹影子。皇马今夏用1.03亿欧元(约8.82亿港元)向多蒙特收购祖迪比宁咸，的确物有所值。

祖迪比宁咸唔止射入靓波，其他数据亦非常亮丽，包括16次同对手对抗，有13次胜出，可见佢喺中场截击力亦一流，堪称攻守兼备。赛后祖迪比宁咸好谦虚话，起脚触球一刻做得并唔好，但幸运入咗，最重要系球队赢波。

不过，皇马全取3分亦付出代价，中坚艾达米列达奥受伤退下火线，领队安察洛堤表示，呢位巴西国脚扭伤膝部，情况唔乐观，需要接受进一步检查，先至知道需要抖几耐。