曼城加入爭奪水晶宮助攻王

曼城翼鋒馬列斯已經離隊，根據英國傳媒爆料，「藍月亮」主帥哥迪奧拿正在物色代替人選，包括睇中水晶宮新星米高奧利斯，力爭以3,500萬鎊(約3.5億港元)收購呢位21歲法國小國腳。

其實米高奧利斯曾於2016年喺曼城青年軍受訓，其後轉投雷丁，2年前加盟水晶宮，近2英超上陣63場入4球。呢位左腳仔代表作一定係今年4月英超對列斯聯，貢獻3次助攻，協助球隊大勝5比1，成為英超史上最年輕單場有3次助攻嘅球員，全季聯賽累積11次助攻，屬於水晶宮史上首位做出呢個壯舉嘅球員。

由於米高奧利斯同水晶宮嘅毀約金僅3,500萬鎊，呢個價格對於曼城而言只係濕濕碎，問題係阿仙奴、車路士早已經對佢虎視眈眈，曼城要簽入米高奧利斯，必須同呢2支倫敦勁旅拗手瓜。