新隊長孫興民輸12碼　熱刺逼和賓福特

「後哈利卡尼時代」嘅熱刺作客賓福特，喺新隊長孫興民犯天條下，只能同「蜜蜂兵團」踢成2比2，累球隊痛失2分！

熱刺王牌哈利卡尼日前轉投拜仁，孫興民獲委任為新隊長，正式進入新時代，佢哋一開波即搶攻，11分鐘新兵占士麥迪臣開出罰球，基斯甸羅美路近門頂入，先開紀錄。

不過「孫仔」愈幫愈忙，26分鐘回防返禁區侵犯馬菲亞斯贊臣，經VAR介入後，球證判罰12碼，麥比奧莫操刀一針見血，「蜜蜂仔」殺得性起，10分鐘後左閘域高亨利狂爆一段橫傳，尤尼韋沙快射破網，極速反先2比1。不過完半場前熱刺右閘艾馬遜遠射扳平2比2。

下半場熱刺控制戰局，可惜空晒嘅孫興民於左路窄位抽射，又過唔到對方門將，最終雙方再冇入波，維持2比2比數完場。