車路士簽卡些度　高普：車仔領隊要乜有乜

車路士同利物浦喺英超對決踢成1比1，摩西斯卡些度嘅轉會爭奪戰亦告落幕，據各大權威記者同傳媒報道，車路士開價1.15億鎊(約11.5億港元)已被白禮頓接納，摩西斯卡些度將會同車路士簽9年長約。利物浦領隊高普亦接受現實，酸溜溜回應：車仔領隊通常要乜有乜！

據報車路開出破英超轉會費紀錄嘅1.15億鎊，白禮頓已經接納，摩西斯卡些度周一(14日)進行體測後，就會簽約2031年夏天，而且有條款可選擇續多年至2032年。車路士今年1月用1.06億鎊(約10.6億港元)簽安素費南迪斯，當時已創下英超轉會費紀錄，估唔到時隔半年多啲再創新高。

同樣需要買防中嘅利物浦，到口獵物突然被車路士反搶，高普就酸溜溜回應：「基本上每一個車路士領隊都會向班主要求買球員，而佢哋又多數都可以得償所願。」