迪亞高哥斯達重返巴甲　球員生涯第12支球隊

前西班牙國腳迪亞高哥斯達今夏被狼隊放棄之後，終於有着落，加盟巴甲球隊保地花高，亦係呢位34歲前鋒職業生涯第12支效力嘅球隊，名副其實係「球壇浪人」。

迪亞高哥斯達上年由巴甲球隊明尼路轉投狼隊，上陣25次僅入1球，結果不獲續約，依家又返回巴甲搵食，加盟榜首勁旅保地花高，迪亞高哥斯達話：「好開心可以加入呢個大家庭，多謝大家，快好會見面。」

迪亞高哥斯達本身係巴西人，早年已經去歐洲搵食，效力過布拉加、馬德里體育會、車路士等球隊，曾奪得西甲、英超、歐霸盃等多項錦標，事業最顛峰時間應該係2014至2017年效力車仔期間3季有2季入波超過20球，但因為同前車仔領隊干地不和，而被踢走。

此外，迪亞高哥斯達曾經代表過巴西國家隊踢熱身賽，其後又選擇做西班牙國腳，遭到巴西球迷唾罵。