狼隊獲PGMOL道歉　孭鑊球證有前科

曼聯1比0贏狼隊嘅英超賽事，補時階段出現12碼爭議，球證同VAR對曼聯門將奧拿拿撞低沙沙卡拉積錫全無表示，引起極大回響。據報英國職業裁判員公司(PGMOL)賽後已向狼隊道歉，而涉事嘅VAR球證梳士巴利早有前科，上季已經出事累PGMOL道歉，估唔到新球季首輪又「瀨嘢」。

因投訴而食黃牌嘅狼隊領隊加利奧尼爾，賽後表示PGMOL官員摩斯已經向佢道歉：「我原本以為球證會去場邊睇重播，但原來佢係畀黃牌我。公平啲講，摩斯完場後已經同我道歉，我明白VAR嘅基本規條係盡量唔干預場上球證嘅判決，但我唔係完全接受。」

今場VAR球證係梳士巴利，佢係上季英超其中一單「經典」誤判主角之一，喺白禮頓對熱刺嘅大戰，球證睇唔到三笘薰禁區內被明顯踢跌，而梳士巴利主理嘅VAR未唔幫手，賽後PGMOL亦就錯誤向白禮頓公開道歉，而梳士巴利亦被停賽處分。