安素法迪決定離隊　英超3雄準備出手

巴塞隆拿新星安素法迪，自沙維上任執教後未受重用，據西班牙《阿斯報》報道，呢位20歲翼鋒已經決定離隊，傳聞英超3雄曼聯、阿仙奴同熱刺都對佢好有興趣，隨時準備出手。

拉馬西亞出身嘅安素法迪，曾被視為球會未來巨星，巴塞隆拿甚至將美斯件10號戰衣交畀佢繼承，不過佢自從重傷之後狀態下滑，上季亦未獲沙維重用，今季西甲開鑼戰對基達菲，佢入替時間甚至喺另外2位新人艾沙蘇利同耶馬之後，去到79分鐘先至登場。《阿斯報》指安素法迪自知冇碇企，已決定離隊尋求新機會。

據報沙維並唔想放走安素法迪，而且佢同巴塞隆拿仲有4年合約，轉會費肯定唔低，傳聞曼聯、阿仙奴同熱刺都想簽安素法迪，其中熱刺賣走哈利卡尼後，急需為前線增兵，或會係最積極收購嘅球隊。