車路士都有買唔到嘅人　奧利斯離奇轉軚

車路士今個夏天大事擴軍，日前啟動水晶宮翼鋒米高奧利斯合約內3,500萬鎊(約3.5億港元)買斷條款，水晶宮得悉後非常憤怒，並準備向英格蘭足總控告車路士非法斟介。呢單轉會周五(18日)再有神奇發展，米高奧利斯突然拒絕加盟車路士，仲同水晶宮續約4年，令車仔喺轉會市場罕有落敗。

水晶宮同法國小將米高奧利斯斟續約已一段時間，不過車路士突然殺出，秘密接洽米高奧利斯後再啟動違約金條款，水晶宮領隊鶴臣表示：「當車路士話對你有興趣，球員好難唔受到動搖，尤其佢身邊嘅人會同佢講轉會係最好選擇......」

正當所有人都預期米高奧利斯將轉投車路士，呢位21歲翼鋒周五突然宣布同水晶宮續約4年，周薪加至10萬鎊(約100萬港元)。車路士雖然搶唔到米高奧利斯，但佢哋仍準備繼續招兵，據報打算用5,000萬鎊(約5億港元)收購森林翼鋒班倫莊臣。