基奧特1射1傳幫A米贏波　首輪意甲4大豪門全勝

周二(22日)凌晨意甲，AC米蘭嘅36歲老將基奧特大發神威，射入1球及貢獻1次助攻，協助球隊作客以2比0擊敗博洛尼亞。首輪意甲結束，4大豪門拿玻里、祖雲達斯、國際米蘭、AC米蘭全部旗開得勝。

開賽11分鐘，基奧特近門射入打開紀錄，僅過10分鐘之後，呢位法國國腳傳畀新加盟隊友基斯甸普列錫勁射入網，拉開紀錄至2比0。

現年24歲嘅基斯甸普列錫今夏以2,000萬歐元(約1.7億港元)轉會費由車路士加盟AC米蘭，迅速融入球，已於8月初「貝魯斯干尼盃」對蒙沙，首次為A米入波，今仗首輪意甲又建功，令佢成為史上首位喺歐洲5大聯賽其中3大(德甲、英超、意甲)取得入波嘅美國球員。

首輪意甲過後，上季前4位球隊只有拉素輸波失分，冠軍拿玻里、季軍國際米蘭、殿軍AC米蘭都贏波，至於上季因為造假帳被扣10分嘅祖雲達斯更加大勝烏甸尼斯3比0，捲土重來鬥志十足。