【官宣】貝拿度施華續約曼城：繼續創造歷史

今個夏天盛傳獲巴黎聖日耳門同沙特球會斟介嘅貝拿度施華，周四(24日)宣布同曼城續約至2026年，粉碎離隊傳聞，呢位葡萄牙球星表明喺曼城已「習慣勝利」，承諾會繼續創造更多歷史。

29歲嘅貝拿度施華喺2017年加盟曼城，拎過5次英超冠軍同1次歐聯冠軍，佢續約後表示：「今季係我喺曼城第7季，球隊所贏得嘅獎盃已經令我夢想成真，曼城已經代表勝利、冠軍，我聽聞英超從未有球隊試過4連冠，所以我想挑戰呢個紀錄，我哋會繼續嘗試創造更多歷史。」

貝拿度施華選擇留隊，不過另一球星拿樸迪就宣布離開曼城，以2,350萬鎊(約2.35億港元)轉會費加盟艾納斯，佢哋社交網發出告別信：「我喺曼城度過5年半永世難忘嘅日子，有太多嘅回憶，我會永遠將佢保存喺心入面......」