盧頓主場翻新趕工　或先局部開放

今季首度征戰英超嘅盧頓，因為主場翻新工程拖延，上輪聯賽對般尼被逼延期，消息指凱尼沃斯路球場經過連日趕工，進度已經大大提升，下周中英聯盃主場對基寧咸有望喺局部開放下進行，預計9月2號對韋斯咸會首度喺英超主場亮相。

盧頓嘅凱尼沃斯路球場喺1905年興建，唔少設施都非常殘舊，而且唔仲未附合英超規定，所以盧頓升班後即斥資1,000萬鎊(約1億港元)，包括重建其中一面看台，加入球員通道、媒體室等，原本打算英超開咧前搞掂，但因為工程延誤，搞到上場聯賽都要申請延期。

據盧頓球迷網站圖片，凱尼沃斯路球場近日已安裝全新藍色座位，樓梯同通道已差唔多完工，盧頓官網公布對基寧咸一仗嘅波飛安排，亦有銷售重建看台以外嘅其他位置波飛，預示盧頓好大機會喺今季首度主場出擊。

除重建凱尼沃斯路球場之外，盧頓已着手喺新址興建一個全新主場，但預計要2至3年時間先可以落成，目標係喺2026年正式啟用。