曼聯諗縮數　又想免費簽李城棄將

曼聯左後衞勞基梳爾受傷面臨長抖2個月，加上會方已經將班頓威廉斯外借去葉士域治，另1位左閘杜維爾馬拉西亞養緊傷，令紅魔鬼遇上「左閘荒」，英國傳媒指主帥坦哈格希望簽入左後衞，並睇中今夏被李斯特城放棄嘅賴恩貝特蘭。

坦哈格話：「如果情況許可，的確有可能簽入1位左後衞，但必須係合適嘅球員，否則只能沿用現有人腳。」至於目標人物賴恩貝特蘭現年已經34歲，曾經效力諾域治、雷丁、修咸頓等球隊，過去2季效力李斯特城僅上陣11次，今夏已約滿離隊成為自由身球員，隨時可以免轉會費成「魔」。

曼聯今夏已經搵咗約滿離開李斯特城嘅中堅莊尼伊雲斯回巢，就算簽入賴恩貝特蘭做「替工」都唔出奇。