古天奴即將離開維拉　轉戰卡塔爾

巴西球星菲臘比古天奴有可能今夏離開英超，消息指佢已經同卡塔爾班霸艾杜哈尼達成個人協議，嚟緊等待維拉同艾杜哈尼之間談判，由於古仔係一名高薪後備，離隊將可減輕維拉負擔，放人機會甚高。

轉會專家羅曼諾報道，艾杜哈尼今夏有意簽入古天奴，雙方就個人條款已經達成一致，目前只等待維拉批准交易就可成事，雙方正在談判，艾杜哈尼對今次交易非常認真，希望促成轉會。

古天奴上仗對愛華頓後備上陣，但受傷離場，事後檢驗左腳傷勢唔算嚴重，休養3周就可康復，因此無阻其轉會運作，近日沙特聯賽大肆搶人才，其實卡塔爾都有唔少球星，艾杜哈尼主帥就係前阿根廷國腳基斯普，今次出手爭奪古天奴，即將到手。

早前西班牙傳媒報道，如果古天奴轉會費超過2,000萬歐元(約1.7億港元)，其前球會巴塞隆拿可獲一半分帳，不過報道未有披露艾杜哈尼轉會費報價，而古天奴目前在維拉周薪為12.5萬鎊(約123萬港元)。