麥迪臣古斯基齊開齋　熱刺2連勝

周六(26日)英超早場，般尼茅夫主場迎戰熱刺。熱刺憑占士麥迪臣同古路施夫斯基齊齊開齋，作客贏2比0取得英超2連勝，為新任領隊普斯迪高路周日58歲生日提前賀壽。

熱刺一向都係前鋒煞食，不過經新帥普斯迪高路改造，依家中場鐵三角都有料到，17分鐘，比蘇馬策動攻勢，柏比沙亞接應送出直線劏穿對方防線，占士麥迪臣面對對方門將尼圖冷靜射入，熱刺領先1比0，入波後做「掟飛鏢」慶祝動作。

熱刺箭頭李察利臣今場有唔少機會，佢亦搏晒命爭取入波，可惜腳風欠順，35分鐘一次單刀埋門，佢想扭過尼圖再起腳結果被封，反而般茅完半場前一次攻勢，菲臘標寧勁射柱邊出界，熱刺逃過一劫。

下半場李察利臣繼續唔爭氣，一次攻門自己踩波車跣低失波，起身後再魯莽犯規踢對方球員，搞到被黃牌警告，卒之普斯迪高路喺61分鐘收起佢，換入賀積查治。熱刺一變陣即刻有收穫，烏杜治落底傳中，古路施夫斯基近門輕鬆射成2比0完場。