【官宣】A山重返國米　人工大縮水

意甲勁旅國際米蘭正式宣布簽回智利國腳阿歷斯山齊士，合約為期1年，年薪為250萬歐元(約2,100萬港元)，僅及佢首度效力國米時期嘅三份之一，呢位34歲前鋒仍然豪言壯志，聲稱會比之前取得更大成就。

國際米蘭今夏放走2位射手盧卡古、迪斯高，近日再將另一位前鋒祖亞昆哥利亞外借去馬賽，最巧合今次簽入剛離開馬賽嘅阿歷斯山齊士。A山簽約後話：「眾所周知，國際米蘭係大球會，仲係上屆歐聯亞軍，我想取得成功，所以選擇加盟國際米蘭呢種大球會，希望今次回巢可以獲得更大成就。」

阿歷斯山齊士3年前被曼聯外借去國際米蘭1季，其後被買斷，總共效力國米3季，上陣109場入20球，捧過意甲及意大利盃冠軍，上年夏天轉投馬賽，上陣44場入18球，但僅1季就離隊，兜兜轉轉又重返國米。

阿歷斯山齊士之前效力國米着7號，但呢個號碼現時已屬於新兵古達度所有，A山今次選擇着70號。國米將於周二(29日)凌晨意甲作客卡利亞里，A山仍未準備好上陣，估計要等到下輪主場對費倫天拿，先至會披甲。