唔留手！馬體會作客狂勝7比0創紀錄

周二(29日)凌晨西甲賽事，馬德里體育會繼續展示爭標實力，作客7比0狂勝華歷簡奴，創造球會史上西甲最大作客勝仗紀錄。馬體會教練施蒙尼賽後表示，佢哋會嘗試挑戰皇家馬德里同巴塞隆拿嘅霸權，但就擔心沙特球會「搞亂檔」。

馬體會今個夏天未有花大錢買人，不過整體實力仍得到保持，頭2輪聯賽1勝1和後，今仗入局極快，基沙文開波2分鐘先開紀錄，加埋迪比同拿侯爾摩連拿入波令客隊上半場領先3比0。換邊後馬體會冇留手，艾華路莫拉達梅開二度，安祖哥利亞同馬高斯洛蘭迪亦有斬穫，最終馬體會有6個球員入波下狂勝7比0。

施蒙尼賽後表示：「我好鍾意球員今場表現，我哋係支好有競爭力嘅球隊，皇馬同巴塞喺西甲超班，但馬體會都好有份量，如果佢哋有咩失準，我哋會隨時準備好。」馬體會冇錢買人，但施蒙尼更擔心主力會被沙特挖角：「轉會窗結束係件好事，不過最危險係沙特，佢哋喺歐洲轉會窗完結後仲可以買人，希望唔會發生喺我哋身上。」