甸恩軒達臣結束紅魔生涯　轉投水晶宮

英國傳媒報道，曼聯副選門將甸恩軒達臣即將離隊，今個星期轉會水晶宮，轉會費2,000萬鎊(約1.97億港元)，球員正接受體檢，可望於周五前完成交易。

英國《天空體育》報道，曼聯簽入奧拿拿後，甸恩軒達臣想做正選門將希望幻滅，獲准轉會，早前曾有諾定咸森林及熱刺進行斟介，依家最大機會轉投水晶宮，取代古亞達出任1號門將。

26歲嘅甸軒係曼聯青訓出身，一度被視為迪基亞接班人，曾外借去錫菲聯同諾定咸森林，但佢實在太心急要做曼聯1號門將，曾公開炮轟曼聯「浪費佢時間」，又拒絕坦哈格要求提前結束外借歸隊，卒之得罪坦帥，紅魔生涯亦走到盡頭。

曼聯希望喺周五中午前送走甸軒，然後簽入土耳其門將比恩迪亞做奧拿拿副手，報道指比恩迪亞獲分配1號球衣，頗受球隊重視。