巴塞內訌　羅拔佬炮轟沙維戰術保守

西甲勁旅巴塞隆拿近期表現回勇，取得2連勝，但卻發生將帥不和事件，射手羅拔利雲度夫斯基公開批評教練沙維戰術保守，對佢喺鋒線上支援不足，有違巴塞傳統華麗足球風格。

羅拔利雲度夫斯基接受西班牙《世界體育報》訪問時話：「我哋係巴塞隆拿，唔止要贏，仲要踢出華麗進攻足球，但我哋好多時場上唔夠進攻球員，我得唔到支援，呢個問題需要解決，最簡單睇番上場對維拉利爾，安素法迪、費倫托利斯上陣之後，創造好多攻門機會，佢哋冇理由做後備。」

沙維今季經常只用羅拔利雲度夫斯基踢單前鋒，並以加維、柏迪、根度簡等中場支援佢，最多用埋16歲小將耶馬踢右翼，令「羅拔佬」覺得冇足夠傳送，今季踢3場西甲只入1球，條氣梗係唔順，唔知沙維會唔會接受佢建議，排出更進取陣式呢？