【官宣】馬古尼轉會...曼聯迷開心咗1秒

轉會窗就快結束，曼聯一直賣唔出前隊長哈利馬古尼，令球迷非常擔心，估唔到周四(31日)突然爆出馬古尼落實轉會消息，而且仲着埋新球會波衫亮相！不過睇真啲，原來呢個同哈利馬古尼勁似樣嘅球員，其實係佢細佬羅倫斯馬古尼，佢由非聯賽球隊車士打菲特外借到英乙嘅卡維尼。

26歲嘅羅倫斯馬古尼係哈利馬古尼細佬，兩兄弟個樣餅印一樣，同樣司職後衞嘅羅倫斯馬古尼多年來都喺地區聯賽打滾，今次轉戰英乙係佢足球生涯一大突破，唔少網民睇到佢嘅加盟發布會相片，都話以為哈利馬古尼轉會，網民留言：「我開心咗1秒」、「兩兄弟個樣一模一樣」、「佢哋係咪一樣咁好波？」

至於哈利馬古尼去留仍未有定案，近日有傳韋斯咸向曼聯重新展開斟介，不過隨住法國中堅華拉尼受傷，曼聯亦可能需要哈利馬古尼繼續留隊。