白禮頓搶贏安素法迪　同三笘薰拍住上

英超神奇球隊白禮頓今季首戰歐洲賽，球隊亦喺轉會窗完結前加碼，據報佢哋成功借用巴塞隆拿天才前鋒安素法迪，呢位20歲新星一度被譽為「美斯接班人」，加盟白禮頓將同三笘薰組成恐怖進攻組合。

轉會權威Fabrizio Romano報道，今季喺巴塞隆拿未受重用嘅安素法迪將被外借，原本熱刺率先出手，但白禮頓領隊迪沙比同安素法迪聯絡後，成功說服呢位西班牙前鋒加盟。報道指白禮頓會借用一季，而且冇包含任何買斷條款，如果安素法迪可以喺英超踢番起，巴塞隆拿有意回收重用。

白禮頓有「扭波王」三笘薰出任左翼，預計同樣靠左路嘅安素法迪加盟後，會出任前鋒或進攻中場，隨時同三笘薰互換位置，如果安素法迪可以踢番出道嘅天才表現，有望同三笘薰成為英超其中一隊最強進攻組合。