英格蘭公布大軍名單　馬古尼英超0上陣照入選

英格蘭國家隊主帥修夫基公布出戰9月2場國際賽嘅大軍名單，曼聯中堅哈利馬古尼今季英超完全冇上陣過，但仍然獲得徵召，反而近況大勇嘅車路士翼鋒史達寧卻榜上無名，惹起輿論批評，指責「修哥」用人惟親。

英格蘭今次26人大軍名單之中，存在唔少爭議，除咗哈利馬古尼今季3場英超0上陣都有份入選之外，同樣喺曼城長坐冷板嘅中場加雲菲臘斯，以及已經去咗沙特阿拉伯搵食嘅33歲老將佐敦軒達臣亦獲得徵召，令人質疑修夫基固步自封，令球隊難以進步。

不過，呢份名單都有驚喜地方，就係首次徵召阿仙奴前鋒尼基迪亞，呢位24歲前鋒因為之前一直未能入選英軍，幾乎轉為代表加納，依家總算守得雲開，成為「三獅兵團」一員。

英格蘭將於9月10日凌晨歐國盃外圍賽作客烏克蘭，3日之後同蘇格蘭踢熱身賽。