PSG天價標尾會　7.6億買到「麥巴比接班人」

歐洲夏季轉會窗最後1日再有天價交易，法甲豪門巴黎聖日耳門(PSG)正式宣布成功收購法蘭克福前鋒高路梅安尼，雙方簽約5年，據悉轉會費總值高達9,000萬歐元(約7.6億港元)，PSG簽入呢位24歲法國國腳，相信係為咗頂替可能明年離隊嘅基利安麥巴比。

PSG今夏有2位鋒線巨星美斯、尼馬離隊，基利安麥巴比即使留隊，但亦好可能明夏走人，會方有必要簽入高質素前鋒，繼早前向巴塞隆拿收購奧士文尼迪比利之後，今次再買入同屬法國國腳嘅高路梅安尼。呢位前鋒上季為法蘭克福各項賽事上陣46場入23球及14次助攻，並有份出戰上年世界盃，但佢喺決賽加時最後一刻錯失入波黃金機會，成為法國失冠罪人，但無損其價值，曾經傳出曼聯、拜仁慕尼黑等大球會都想簽佢，最終被PSG收歸旗下。

高路梅安尼入「門」後，將會着23號球衣，值得一提，一向屬於「聯合國球隊」嘅PSG，鋒線將完全本土化，由基利安麥巴比、奧士文尼迪比利、高路梅安尼3位法國國腳合作攻堅。