曼聯成功追貨　連簽2位大將

曼聯喺轉會窗關閉前最後一刻，追貨得手，以先借後買方式簽入費倫天拿中場蘇夫恩岩拉伯特，並同今夏回巢跟操嘅中堅莊尼伊雲斯簽約1年，以舒緩防線傷兵問題。

早已經傳出曼聯計劃簽入蘇夫恩岩拉伯特，最終成功同費倫天拿達成協議，紅魔鬼先以1,000萬歐元(約8,500萬港元)借用呢位27歲摩洛哥國腳1年，明夏有權以2,000萬歐元(約1.7億港元)買斷佢。

蘇夫恩岩拉伯特以踢法硬朗見稱，有份協助摩洛哥打入上年世界盃4強，被認為比曼聯另一位新兵美臣蒙特，更加適踢防守中場位置，加上美臣蒙特正在養傷，蘇夫恩岩拉伯特有望獲曼聯主帥坦哈格重用。

另外，由於中堅華拉尼受傷，曼聯最終決定同莊尼伊雲斯簽約1年，呢位35歲北愛爾蘭國腳出身於曼聯青訓系統，曾為紅魔鬼上陣近200場，加上今夏已經跟操一段日子，相信可以迅速融入球隊。