C朗着火1射2傳　職業生涯850球達成

周日(3日)凌晨沙特阿拉伯聯賽，葡萄牙巨星C朗又有精彩演出，射入1球及貢獻2次助攻，率領艾納斯作客以5比1大勝哈斯美，各項賽事4連勝。C朗職業生涯已經累積入850球，繼續刷新史上入球王紀錄。

艾納斯強攻對手，上半場33分鐘，C朗傳畀加列比射入打開紀錄，值得一提C朗上仗曾經讓畀加列比主射12碼，但呢位中場卻宴客，今仗C朗再次為佢創造機會，加列比終於不負所托，成功開齋。上半場補時，阿卜杜拉艾卡巴尼為艾納斯射成2比0。

換邊之後，哈斯美一度追至1比2，但C朗又發威，橫傳畀葡萄牙同胞奧達維奧艾美臣射入空門，跟住C朗自己都入番1球，將個人入波紀錄增添至850球，另一位球星沙迪奧文尼射成5比1完場。

賽後C朗喺社交網話：「又一場偉大團隊表現，我哋正在不斷提升，要保持下去，職業生涯850球，陸續有來。」38歲嘅C朗今季狀態大勇，近3場聯賽合共轟入6球及4次助攻，早前更當選為沙特聯賽8月最佳球員，果然老而彌堅。