鎌田大地開齋　拉素打破拿玻里不敗身

周日(3日)凌晨意甲，拉素作客以2比1擊敗上季冠軍拿玻里，爆出5.4倍冷W，兼終止對方開季2連勝走勢。今夏以自由身從法蘭克福加盟拉素嘅日本國腳鎌田大地射入致勝1球，亦係佢登陸意甲之後首次入波，盡顯功架。

兩軍近期表現原本有天壤之別，拿玻里開季2連勝，拉素2連敗，但今仗交鋒戰況卻出人意表，拉素上半場30分鐘由路爾斯阿拔圖射入先開紀錄，拿玻里好快由施連斯基遠射入網扳平。

換邊之後，鎌田大地建功，呢位27歲中場今季3場聯賽都踢正選，今仗終於開齋。鎌田大地上季為法蘭克福各項賽事上陣47場入16球，踢法極具侵略性，佢依家喺意甲取得「零的突破」後，相信入波陸續有來。

值得一提，拉素2個入波都來自菲臘安達臣嘅助攻，仲有薩卡尼、古安杜斯入波「食詐胡」，否則拉素唔止贏2比1。

至於拿玻里今場有61.2%控球率，但22次射門僅4次中目標，首席射手域陀奧森漢5次起腳都唔中目標。反觀拉素全場6次射門2次中目標就入咗2球，攻門把握力成為勝負分野。